8. mei: Henda dag í 1859 var tann geniali matematikarin og veikstreyms-ingeniørurin JOHAN VALDEMAR JENSEN føddur í Nakskov. Hann vaks kortini upp í Norður-Svøríki, har pápi hansara, sum var bókahandlari, hevði fingið starv eitt skifti, men sum 17 ára gamal kom Jóhan aftur til Danmarkar og búsetti seg í Kjøpinhavn, har hann las matematikk og fysikk ( við veikstreymi og telefoni sum sergrein) á tí viðgitna Polytekniska Lærustovninum við Silvurtorgið á Eystarubrúgv.
Í allari sínari frítíð arbeiddi hann kortini við subtilum matematiskum problemum, og tað lukkaðist honum at finna ein formul fyri samanhangið millum sonevndan holomorfan funktiónsvøkstur og nullpunktir. Størstu internationalu viðurkenning fekk hann fyri sínar konveksu funktiónir og ó-líkningar. Hann hevur eisini arbeitt við sonevndari Weirstrasskari avmynding av funktions-teori.
Tey síðstu arbeiðsárini stríddist hann við ta Riemannsku zeta-funktiónina, har hann kom langt ávegis, uttan beinleiðis prógv.
Hann roknast fyri at vera ein av teimum mætastu matematisku teoretikarunum fyrst í 1900-talinum. Í 1892 bleiv hann formaður fyri "Matematisk forening." Hann sat eisini fleiri ár í stjórnini á "Elektroteknisk forening."
Í 1907 bleiv hann limur av "Videnskabernes selskab," har hann seinni bleiv formaður. Í 1918 bleiv hann heiðursdoktari við Lunds Universitet.
Hann er allarhelst betri kendur í útlondum, enn í Danmark.
Orsøkin til, at hann kanska er so lítið kendur í dag, er helst tí, at hann aldrin tók nakað formelt magistaraprógv í fysikk ella matematikk, tí hann bleiv so upptikin av at arbeiða við praktiskari telefoni, sum gjørdist hansara livibreyð.
Hann var ein av teimum fyrstu tekniskt og teoretiskt skúlaðu leiðarunum av KTAS, tí stóra telefonfelagnum í Kjøpinhavn. Í dag er KTAS fusionerað við onnur donsk feløg og eitur TDC.
Jóhan Valdemar Jensen arbeiddi har sum yviringeniørur til 1924 og gjørdi fleiri patenteraði uppfinnilsir í praktiskari telefoni.
Sína síðstu tíð var hann plágaður av álvarsligari hjartasjúku og tunglyndi.. Jóhan Valdemar doyði í 1925 og liggur grivin á Bispebjerg kirkjugarði.
No comments:
Post a Comment